Nagpanindugan ang Presidente sang Bacolod Alliance for Commuters Operators and Drivers (Bacod) nga sila ang magapakigbato tubtob sa ulihi.
Ini kasunod sang pahayag ni Land Transportation Franchising and Regulatory Board (LTFRB) chairman Atty. Teofilo Guadiz III nga wala na sang extension sa Public Utility Vehicle consolidation matapos ang Abril 30.
Sa interview sang Bombo Radyo Bacolod kay Rudy Agsam Catedral, madamo na sang nagwithdraw, naghinulsol kag nabankrupt sa mga nagsulod sa consolidation process.
Pahanumdom sini nga 590 pa lamang ang modernized jeepneys sa ciudad sang Bacolod samtang masobra tres mil naman ang nagabyahe nga traditional jeepneys.
Gani kun madula ang mga traditional jeepneys sa Mayo 1, ginalantaw na sini nga wala sang masakyan ang mga pumuluyo.
Ginadumdom naman sini nga filing na sang Certificate of Candidacy para sa 2025 midterm election sa bulan sang Oktobre, gani nagapati ini nga indi pa madula ang mga traditional jeepneys, bangod ang issue ang sakyan sang mga nagapapili agud maka-angkon sang simpatya kag boto.
Sa tres mil nga mga traditional jeepneys nga nagabyahe sa Bacolod City, yara sa 800 ka mga units ang miyembro sang BACOD.
Gin-athag naman ni Catedral nga ang BACOD ang nagsipak na sa National Transport Group nga MANIBELA, apang sila ang naga-upod sa panawagan ang PISTON sang nationwide transport strike sa Abril 15.
Panindugan sini nga ang consistent nila nga ginapakigbato amo ang rehabilitasyon sang mga traditional jeepneys imbes nga consolidation.
Dugang pa sini nga nagbackout naman ang mga drivers kag operators nga ginlakip sa consolidation apisar nga wala napahibalo.
Ang Nationwide Transport Strike sa Abril 15 nga ginalantaw updan sang dos mil nga mga traditional jeepney units, ang magaserbe nga preparasyon para sa palaabuton nga Congressional inquiry sa Abril 22.
Pahayag ni Catedral nga sa ikaduha nga Transport Congressional Hearing kun sa diin siya ang nagserbe nga representante, ginpaboran sang madamo nga mga kongresista kag may-ara na sang listahan sang pirma sa mga nagasuporta sa kawsa sang mga traditional jeepney drivers and operator.
Nagapati si Catedral nga kun indi masolusyunan, mamroblema ang pungsod bangod 67,000 nga mga traditional jeepney drivers ang wala nagsulod sa consilidation, samtang madamo man ang nag-atras kaangay sang masobra 800 sa Iloilo.
Ginalantaw ni Catedral nga psychological war lamang ang ginahimo sang LTFRB chairman.
