Nakilal-an na ang bangkay sang lalaki nga nasapwan kaina kapin alas-8:00 sang aga sa katubuhan sa Sitio Kangkong, San Agustine, Barangay Bagroy sa banwa sang Binalbagan.
Ang biktima ang nakilala nga si Anthony Toledo, alias Alog, 43 anyos, may live-in partner, tricycle driver kag residente sa Barangay 4, sa banwa sang Isabela.
Sa interview sang Bombo Radyo Bacolod kay Police Lt. Glen Portunes, deputy chief of Police sa Binalbagan Municipal Police Station, kapin alas-8:00 sang aga, nakalabay ang isa ka lalaki nga nagabisikleta sa area, kag ini ang nakabati sang alarm sang cellphone.
Gilayon man sini ginpangita kun diin ang nagahuni kag didto na nasapwan sa sulod sang mataas na nga kampo, ang nagahamyangon nga duguon nga lawas sang biktima.
Sa imbestigasyon sang kapulisan, ini ang madamo sang pilas tuga sang pagpamuno kag ginlaslas ang liog.
Pahayag sang live-in partner sang biktima nga ini ang nagabyahe sang tricycle sa banwa sang Isabela apang kun kaisa, ini ang nagabatun man sang naga-arkila padulong sa ciudad sang Himamaylan kag banwa sang Binalbagan.
Suno sa live-in partner, naglesinsya pa sa iya si Toledo nga magabyahe, tubtob nga nabatun na lamang sini ang impormasyon nga nasapwan nalang ang iya partner.
Wala naman makita ang wallet sang biktima, gani isa man sa ginalantaw nga motibo sa krimen ang pagpangawat.
Apang ginalantaw man ang posibilidad nga ang pagpatay ang bangod sa personal nga dumot ilabi na nga brutal ang pagpatay diri.
May posibilidad man nga indi lamang isa ka persona ang suspetsado.
Suno kay Portunes, wala pa nagtig-a ang bangkay gani ginalantaw nga sang kaagahon lamang ginpatay ang biktima.
Ginapahayag man sang mga malapit sa lugar nga alas-3:00 sang kaagahon, nabatian nga nagginu-al ang mga ido.
