Duha ang patay kag tatlo ang pilason matapos nga nabungguan sang SUV ang isa ka tricycle sa intersection sang Gatuslao kag BS Aquino Streets sa ciudad sang Bacolod, alas-4:38 kaina sang kaagahon, October 21.
Sa interview sang Bombo Radyo Bacolod kay Police Major Elmer Bonilla, pinuno sang Traffic Management Unit, ginausoy sang Toyota Fortuner ang south to north direction samtang nagabyahe naman ang tricycle sa west to east direction sang nagluntad ang insidente.
Ang tricycle ang ginamaneho ni Openiano Ayco, residente sang Purok Tumpok, Zone 15, Talisay City, samtang sakay naman diri sanday Crislyn Joy Poja, Roda Tipon, Cheralyn Poja, kag Redilla Gamgam, lunsay mga residente sang Purok Sibucao, Brgy. Banago, Bacolod City.
Halin sila sa Barangay Banago kag padulong sa Libertad Public Market.
Ang SUV naman ang ginamaneho sang 17-anyos nga residente sang Sitio Marta, Brgy. Masulog, banwa sang La Castellana.
Bangud sa kakusog sang impact sang pagbunggo sang SUV sa tricycle, napatay sanday Cheralyn Poja, kag Redilla Gamgam.
Nagtabog pa ang iban nga karga sang tricycle kag nagpilit sa kilid sang salakyan ang mga hipon.
Suno kay Bonilla, ang menor de edad nga driver sang SUV ang yara na sa kustodiya sang Bacolod Police Station 2.
Siya ang mahimo nga kasuhan sang reckless imprudence resulting to homicide kag damage to property.
Sa interview sang Bombo Radyo kay Jesse Tarazona, magulang sang napatay nga si Cheralyn Poja, adlaw-adlaw nagapadulong sa Libertad Public Market ang iya manghod para magbakal sang iya mga ginabaligya sa tyangge.
Suno kay Tarazona, mapasaka siya sang kaso apang kun mahimo mahatag sang driver sang salakyan ang ila ginapangayo nga kondisyon, batonon na lang nila ang settlement.
Si Cheralyn ang may yara sang duha ka bata kag suno kay Tarazona, maayo nga tawo ang iya manghod kag indi ini dalok.
