Duha na ka Bagyo ukon Tropical Depression ang yara sa sulod sang Philippine Area of Responsibility matapos magsulod alas-11:00 kagab-i ang Bagyo NANDO.
Ang Tropical Depression MIRASOL ang nagahulag na sa karun sa West Northwestward nga dereksyon sa kadagatan sa nakatungdan nga bahin sang Extreme Northern Luzon.
Samtang nagapabilin naman ang kabaskugon sang Tropical Depression NANDO nga nagahulag padulong sa North Northwestward nga dereksyon samtang yara sa Philippine Sea.
Ang Bagyo MIRASOL ang ulihi nga nasiplatan sa 165 km sa nakatungdan sang Calayan, Cagayan.
Dala sini ang kabaskugon sang hangin nga nagadangat sa 55 km/h kag pagmadlos nga tubtob 70 km/h, samtang ini ang nagahulag sa kadasigon nga 10 km/h.
Yara gihapon sa Tropical Cyclone Wind Signal no. 1 ang:
-Batanes
-Babuyan Islands
-Nakatungdan nga bahin sang mainland Cagayan
-Apayao
-Naaminhan nga bahin sang Abra
-Ilocos Norte, kag
-Naaminhan nga bahin sang Ilocos Sur
Lauman ang mas mabaskog nga huyop sang hangin partikular na sa mga malapit sa kadagatan kag yara sa kabukiran kasubong man ang pagbubo sang madamol nga pag-ulan sa mga lugar nga napaidalom sa Signal no. 1.
Samtang ginalauman naman nga magapadayun sa paghulag ang Bagyo MIRASOL sa west northwestward nga dereksyon sa masunod nga 24 oras.
Ang nasambitan nga weather disturbance ang mahimo naman nga makagwa sa PAR subong nga aga ukon karun sa hapon.
Sa paggwa sa PAR, ini ang ginalauman nga magapadayun sa northwestward nga dereksyon padulong sa southern China.
Dako naman ang posibilidad nga magabaskog pa ang Bagyo MIRASOL sa tropical storm category subong nga adlaw.
Ini ang ginalantaw nga magapabilin bilang tropical storm, apang magahuyang man sa paglandfall sa Southern China sa Sabado.
Samtang nagsulod naman alas-11:00 kagab-i sa PAR ang Tropical Depression NANDO kag napabilin sini ang kabaskugon samtang yara sa Philippine Sea padulong sa North Northwestward nga dereksyon.
Alas-4:00 kaina sang kaagahon, ini ang ulihi nga nasiplatan sa 1,225 km sa nasidlangan sang Southeastern Luzon.
Dala sini ang kabaskugon sang hangin nga nagadangat sa 55 km/h kag pagmadlos nga tubtob 70 km/h, samtang ini ang nagahulag sa kadasigon nga 15 km/h.
Wala naman sa karun sang lugar nga napaidalom sa Tropical Cyclone Wind Signal bangod sa Bagyo NANDO.
Luwas sa mga Bagyo, padayun man ang epekto sang Southwest Monsoon ukon Hangin Habagat, nga lauman nga makatuga sang mabaskog nga huyop sang hangin sa mga lugar nga malapit sa kadagatan kag sa mga nabukid nga mga lugar nga expose sa hangin.
Lauman ang maulanon nga panahon subong nga adlaw sa La Union, Pangasinan, Zambales, Bataan, Metro Manila, Cavite, Batangas, Tarlac, Pampanga, Benguet, MIMAROPA, Quezon, Bicol Region, kag Western Visayas bangod sa Habagat.
Ginalantaw nga pabaskugon pa sang Bagyo NANDO ang Habagat sa pagpahilapit sini sa kadutaan, kag ginalantaw nga mahimo ipasaka ang Wind Signal No. 1 sa pila ka bahin sang Northern Luzon sumugod sa Sabado, samtang ang pinakamataas naman nga Wind Signal nga mahimo idagdag bangod sa Bagyo NANDO ang mahimo magdangat sa Wind Signal No. 5 bangod ini ang may posibilidad nga magsanyog pa sa super typhoon category.
Ginalantaw nga mahinay nga magahulag ang Bagyo NANDO sa naaminhan-nakatungdan nga dereksyon samtang yara sa Philippine Sea sa masunod nga 48 oras.
Ini ang ginalantaw nga magaliko sa west northwestward nga dereksyon sa Sabado sang hapon padulong sa Extreme Northern Luzon.
Lauman nga ini ang mabaskog pa samtang yara sa Philippine Sea kag magasanyog sa Typhoon category sa Sabado, kag mahimo magsaka pa sa super typhoon category.
