Alas-5:00 subong nga aga, ang Tropical Storm “ENTENG” ang may gamay nga pagbaskog samtang naghinay naman ang hulag sini samtang yara sa kadagatan sang Vinzons, Camarines Norte.
Ang bagyo ang nagahulag sa West Northwestward nga dereksyon sa kadasigon nga 10 km/h, dala ang hangin nga may kabaskugon nga nagadangat sa 75 km/h kag pagmadlos nga tubtob 90 km/h.
Ginpaidalum na sa Tropical Cyclone Wind Signal no. 2 ang northeast portion sang Camarines Norte, northeastern portion sang Camarines Sur, nasidlangan nga bahin sang Cagayan kalakip na ang Babuyan Islands, nasidlangan nga bahin sang Isabela, Polillo Islands, nasidlangan nga bahin sang Quirino, kag nasidlangan nga bahin sang Kalinga.
Signal No. 1 naman sa mabagatnan nga bahin sang Batanes, nasidlangan nga bahin sang Abra, Apayao, nabilin nga bahin sang Kalinga, nasidlangan nga bahin sang Mountain Province, nasidlangan nga bahin sang Ifugao, nasidlangan nga bahin sang Cagayan, nabilin nga bahin sang Isabela, nabilin nga bahin sang Quirino, nasidlangan nga bahin sang Nueva Vizcaya, nabilin nga bahin sang Aurora, nasidlangan nga bahin sang Nueva Ecija, nasidlangan nga bahin sang Bulacan, nasidlangan nga bahin sang Rizal, nasidlangan nga bahin sang Laguna, naaminhan kag nabagatnan nga bahin sang Quezon, Marinduque, nabilin nga bahin sang Camarines Norte, nabilin nga bahin sang Camarines Sur, Albay, Sorsogon, Catanduanes, kag naaminhan nga bahin sang Masbate kalakip na ang Ticao kag Burias Islands.
Malauman ang mas masami nga mga pag-ulan sa mga matag-as nga lugar kaangay sang mga kabukiran, samtang ginapaaligmat naman ang tanan sa posibilidad sang pagluntad sang mga pagbaha kag landslide.
Ginpabaskog man sang bagyo ang Southwest Monsoon ukon Hangin Habagat nga magadala sang dugang nga mga pag-ulan partikular na sa nakatungdan nga bahin sang Luzon kag Visayas.
Ginalantaw ang posibilidad sang paglandfall sang bagyo Enteng sa Isabela ukon Cagayan karun sa hapon ukon sa gab-i.
Apang kun ini ang magliko sa nakatungdan nga dereksyon, ginalantaw ang posibilidad nga ini ang magalandfall sa naaminhan nga bahin sang Aurora.
Bwas sa kaagahon, may posibilidad man nga ang bagyo ang magalandfall sa Babuyan Islands.
Bwas tubtob sa Miyerkules, dako ang tyansa nga magbaskog pa ang bagyo samtang yara sa Luzon Strait kag may mga lugar nga ipaidalum sa Wind Signal No. 3.
Ginalauman nga maggwa ang Tropical Storm “ENTENG” sa Philippine Area of Responsibility sa Miyerkules sang gab-i ukon Huwebes sang kaagahon.
