BACOLOD CITY — Nagpanawagan ang Provincial Health Office sang Negros Occidental nga likawan sang mga lalaki ang pagpaidalom sa tradisyunal nga paagi sang circumcision ukon pagpapaltak pinaagi sa palpag.
Suno kay Provincial Health Officer Dr. Ernell Tumimbang, ang palpag ang may mataas nga risgo nga makadulot sang impeksyon sa isa ka lalaki.
Ini bangud mahimo nga nagadala sang higko ang gin-usap nga dahon sang bayabas nga ginabutang sa pilas.
Nagakadapat man suno sa doktor nga islan ang dressing sa kinatawo sang lalaki amo gani nga dapat masunod ang husto nga schedule sang pag-ilis sang bendahe.
Ang circumcision suno kay Tumimbang ang dapat nga patigayunon sang isa ka doktor.
Bangud sini, nagpanugyan ang Provincial Health Officer nga magkadto sa Rural Health Unit agud nga magpapaltak bangud delikado ang tradisyunal nga circumcision.
Samtang, aminado man si Tumimbang nga nagasaka ang kaso sang dog bites sa tion sang summer season amo gani nga nagapanawagan ini sa mga tag-iya sang ido nga mangin responsable nga dog owner.
