BACOLOD CITY — Ginapadalman karun sang kapulisan sa banwa sang EB Magalona kun nga-a may mga hilo kag kandila nga upod sa ulo nga nakit-an nga nasulod sa sako nga nasapwan sa kampo sang tubo, Martes sang aga.
Suno kay Police Senior Inspector Ron Darrel Nigos, hepe sang E.B Magalona Municipal Police Station, ang ulo nga nasapwan sa kampo sang tubo sa Barangay San Isidro ang ginabanta nga kapin napulo katuig na apang nagapaningala sila kun nga-a may upod nga mga hilo kag kandila sa sako kun sa diin ini nasulod.
Sa sini, wala ginadula sang EB Magalona police station nga kahimuan ini sang kulto ukon anuman nga ritwal sa tradisyon.
Gani suno kay Senior Inspector Nigos, magapangusisa sila sa mga katigulangan sa lugar.
Apang ginpadala naman kahapon sa crime laboratory ang nasambit nga ulo agud ipaidalom ini sa eksaminasyon kag mahibaluan kun iya ini sang lalaki ukon babaye kag kun bala may kapilasan pa ini nga naangkon.
