Nag-abot na ang una nga shipment sang imported diesel sang gobyerno kahapon, Marso 26, bilang kabahin sang tikang nga mapabaskog ang suplay sang langis kag mapunggan ang epekto sang pabag-o bag-o nga presyo sini sa lokal nga merkado.
Santo sa Department of Energy (DOE), ginabanta sa 22.5 milyon ka litro ukon 142,000 ka bariles sang diesel ang ila nga nabaton.
Natigayon ini sa direktiba ni President Ferdinand Marcos Jr. sa idalom sang Executive Order No. 110, nga nagtukod sang Emergency Energy Security Program.
Tinutuyo sang ini nga programa nga maproteksyunan ang mga konsumidor kag industriya batok sa gulpyada nga pagsaka sang presyo sang langis sa world market pinaagi sa pagdugang sang lokal nga imbentaryo sang fuel.
Ang pagbakal kag transportasyon sang diesel ang gina-asikaso sang Philippine National Oil Company kag sang PNOC Exploration Corp., nga amo ang gintugyanan sa pagsiguro sang maayo nga pagpatuman sang programa.
Gina-target sang gobyerno nga makatipon sang tubtob 2 million barrels nga reserba sang fuel nga magaserbe nga proteksyon batok sa posible nga kakulangan sa suplay.
Sa pihak sang nagapadayon nga paghulag sang presyo sang langis sa global market, nagpasalig ang DOE nga prayoridad sang gobyerno ang bastante nga suplay sang diesel, nga importante sa transportasyon kag agrikultura.
