Ginkalipay sang mga transport groups ang nangin resulta sang congressional hearing nga ginpatigayon kahapon kun sa diin ginpahanugutan ang mga unconsolidated traditional jeepneys nga makapadayon sa pagbyahe.
Sa interview sang Bombo Radyo Bacolod kay Bacolod Alliance for Commuters Operators and Drivers Inc. (BACOD- MANIBELA) president Rudy Catedral, sa congressional hearing ginpahanugotan ang BACOD-MANIBELA nga maghimo sang ila kaugalingon nga unit nga sila mismo ang maga-manage.
Dugang pa sini, padayon ang ila nga pagbyahe subong nga adlaw bangod nga wala sang may matabo nga dakpanay tubtob sa masunod nga hearing.
Dako ang pagpasalamat sini nga nabalik sa ila ang ila palangabuhian.
Apang, tubtob sa karun nagapanindugan ini nga indi sila magsulod sa ano man nga kooperatiba ukon korporasyon, bangod rehabilitation ang ila ginapangayo.
Samtang, nagpanawagan naman ini sa Land Transportation Franchising and Regulatory Board (LTFRB) kag Department of Transportation (DOTr) nga maghatag sang husto nga datos bangod sila mismo nga mga nagabyahe sa dalanon ang nakahibalo sang matuod nga sitwasyon.
Gin-athag man sini nga wala sang kamatuoran nga ila ginbuslotan ang goma sang mga nagabyahe nga traditional jeepney nga wala nag-upod sa ila rally-protesta.
