BACOLOD CITY – Pormal na nga napasaka ang kaso batok sa iloy nga nagbaligya sang hingalit nga kalipay sa mga foreigner gamit ang kaugalingon nga mga anak kag iban pa nga mga bata pinaagi sa cybersex sa Barangay 26, ciudad sang Bacolod.
Ginkumpirmar ni SPO4 Arlene Torendon, hepe sang Women and Children’s Protection Desk (WCPD) sang Bacolod City Police Office (BCPO), nga antes mag-las-5:00 kaina sang hapon, ila na napasaka ang mga kaso nga paglapas sa Anti-Violence Against Women and their Children Act, Anti-Cybercrime Law, Anti-Child Abuse kag Anti-Trafficking in Person batok sa 35-anyos nga suspetsado pinaagi sa inquest proceeding.
Suno kay Torendon, wala sang piyansa ang nasambit nga mga kaso kag kumpiyansa ang WCPD nga maduktan sang mga panumbungon ang suspetsado nga iloy.
Sa karon, nahunong sa isa ka police station sa ciudad sang Bacolod ang amo nga iloy kag igasaylo sa BJMP-Handumanan kun mapasaka na ang kaso sa korte.
Sa karon, may mga interbensyon nga ginapatigayon ang WCPD kag mga social workers agud indi tuman nga maapektuhan sang trauma ang mga biktima kabataan kag normal nga makapadayon ang mga ini sa ila tagsa ka kabuhi.
