BACOLOD CITY — Igapatuman sang Board of Directors sang Bacolod City Water District (BACIWA) ang mandu sang Civil Service Commission (CSC) National Office nga naga-reinstate ukon nagabalik kay Atty. Juliana Carbon bilang general manager sang water district.
Sa exclusive interview sang Bombo Radyo, ginpahayag ni BACIWA Board of Directors Chairman Atty. Lorendo Dilag nga kun ginamandu sang CSC National Office nga ang pag-reinstate kay Atty. Carbon ang “final and executory”, wala sang mahimo ang hunta-direktiba sang water district kundi ibalik siya bilang general manager.
Apisar nagapati si Dilag nga mahimo pa ma-apelar ang desisyon sang Komisyon pinaagi sa nagakaigo nga proseso, apang bilang abogado, wala ini sang mahimo kundi ang magtuman sa ginamandu sang layi.
Samtang, nagpamalibad naman si Civil Service Commission Region 6 Director Rodolfo Encajonado nga maghatag sang komento angot sa reinstatement ni Carbon.
Suno sa opisyal, wala pa nakalab-ot sa iya talatapan ang kopya sang desisyon kag wala pa niya ini mabasa.
Apang ginpaalinton ni Encajonado nga mahimo pa maka-file sang Motion for Reconsideration ukon makaapelar sa Korte Suprema ang BACIWA Board of Directors agud indi mapatuman ang amo nga mandu.
