Ginalantaw nga may kaangtanan sa utang ang motibo sa pagpatay sa negosyante nga lalaki sa Purok Masagana, Barangay Sum-ag, ciudad sang Bacolod kahapon sang hapon.
Sa interview sang Bombo Radyo Bacolod kay Police Captain Michael Tuburan, officer in charge sang Bacolod Police Station 9, ang biktima nga si Greg Alvin Gelito, 39 anyos, kag residente sang Barangay 35, ciudad sang Bacolod, ang ginpadal-an sang demand letter kag may rekord nga ginpa-blotter ini sa kaso nga estafa kag bouncing check law nga ginserbe sa iya sa Boracay, Aklan.
Suno diri, antes nagpadulong sa Brgy. Sum-ag si Gelito, nagikan pa ini sa Brgy. Mansilingan kun sa diin may yara didto sang ginapatukod nga building kag siya ang contractor.
Pahayag ni Tuburan, padayon ang imbestigasyon sang kapulisan angot sa demand letter nga ginpadala kay Gelito kag kun natigayon ini nga napasakaan sang kaso.
Samtang, suno naman sa nakawitness sa natabo, masami nga nagakadto sa ila nga restaurant ang biktima nga si Greg Alvin Gelito kaupod ang iya mga abyan kag kun kaisa nagkalain-lain pa nga salakyan ang ginagamit sini.
Suno diri, bag-o gid lamang gwa sa restaurant si Gelito kaupod ang iya driver kag sang naghana nga masaka na sa salakyan, may duha ka tawo nga nagasakay sa motorsiklo nga nagtiro sa iya.
Naigo sa ulo ang biktima nga nangin rason sang kamatayon sini.
Wala naman sang suksok nga helmet ang mga suspek apang may tabon lamang ang ila nga ilong kag baba kag sila ang gilayon nga nalagyo.
