Walo ka mga persona ang gindakop sa Barangay Sum-ag kadungan sang una nga gab-i sang implementasyon sang curfew bilang kabahin sang general community quarantine sa ciudad bangud sa coronavirus disease.
Nahibaluan nga ang curfew santo sa Executive Order No. 22 Series of 2020 nga gin-issue ni Mayor Evelio Leonardia ang nagasugod alas-10:00 sa gab-i tubtub alas-4:00 sa kaagahon, magluwas lamang sa pila ka sector nga exempted.
Sa interview sang Bombo Radyo kay Police Lt. Jovito Pastrana, station commander sang Bacolod Police Station 9, ang walo ka mga persona ang nadakpan nga nagainom sa higad sang dalan.
Suno diri, ginbutang sa custodial facility sang Police Station 9 ang mga nagbayolar sa ginapatuman nga curfew sa ciudad apang sila ang ginbriefing may kaangtanan sa curfew kag ginhilway man makaligad ang pila ka oras.
Suno sa police official, ang sin-o man nga magapamatok kun ini ang arestuhon ang mahimo pasakaan sang kaso.
Kaangot sini, nagpanawagan ang Bacolod City Police Office sa mga ginikanan nga mangin responsable sa pagbantay sa ila mga kabataan nga menor de edad.
Suno kay BCPO spokesperson Police Lt. Col. Ariel Pico, dapat indi na pagtugutan sang mga ginikanan nga maghampang sa mga computeran ang mga kabataan agud indi mainfect sang coronavirus.
Dugang pa ni Pico, apisar nga may yara sang ginapatuman nga curfew ang ciudad kabahin sang community quarantine, madamo sa gihapon nga mga computer shops nga nagatugot sa mga kabataan nga maghampang gani ginalantaw sini nga ipasirado na lamang samtang nagapadayon ang pagpaidalom sa ciudad sa community quarantine.
Samtang nagahingyo man ini sa mga barangay officials nga mag-ugment sa pagpatuman sang curfew bangud aminado ini nga kulang katama ang police force sang ciudad kag kalabanan diri ang mga wala sang pagkaon gani indi malikawan nga mabayaan ang post sang check up points.
Apang ginpasalamatan man sini ang iban nga mga barangay officials nga nagabulig sa ila nga magpatuman sang Executive Order nga ginpapanaog sang alkalde sang ciudad.
