Usisaon na sang Guinness World Records ang mga ebidensya nga magapamatuod nga ang 123-anyos nga lola nga nagapuyo sa Kabankalan City, Negros Occidental ang pinakatigulang nga tawo nga nagakabuhi sa bilog nga kalibutan.
Sa impormasyon nga nakuha sang Bombo Radyo, nabaton na sang Guinness World Records ang mga dokyumento angot sa kalawigon sang pagkabuhi ni Francisca Susano sang Barangay Oringao, Kabankalan City.
Si Susano ang magasaulog sang ika-124 nga kaadlawan sa Setyembre 11.
Siya ang ginbun-ag sang Setyembre 11 tuig 1897 kun sa diin ginasakop pa sang mga Espanyol ang Pilipinas.
Sa interview sang Bombo Radyo Bacolod kay Lola Isca sang nagselebrar ini sang 119th birthday sang tuig 2016, iya ginpahayag nga pagkaon sang utan ang sekreto niya sa malawig nga kabuhi.
Talagsa man lang ini nagakaon sang karne.
Nagpamana si Lola Isca sa edad nga 14 kag nakaangkon sang 14 ka mga kabataan.
Walo nalang sa 14 ka mga kabataan ni Lola Isca ang buhi subong kag may yara na ini sang masobra 300 ka mga apo nga yara na sa 4th generation.
Sa karon, ginakilala sang Guinness World Records bilang pinakatigulang nga tawo sa bilog nga kalibutan amo si Kane Tanaka sang Japan nga nagaedad sang 117.
