Daw kaangay sang pelikula ang natabo nga pagkidnap sang isa ka yaya sa ciudad sang Bacolod sa iya ginabantayan nga bata tubtob nga ini ang nabawi sang pamilya.
Lunes sang hapon sang nagbiya ang yaya nga si Irish Martir, 19-anyos sang Purok Santol, Brgy. Mandalagan, sa balay sang iya mga amo sa Brgy. Mansilingan dala ang isa ka tuig kag tunga nga bata nga lalaki patabok sa Miagao, Iloilo.
Nahibaluan nga nagatrabaho ang ginikanan sang nasambit nga bata kag sang nagpauli ang mga ini Lunes sang hapon, ginpabalo sila sang ila subang nga bata nga naglakat ang yaya dala ang iya manghod.
Tubtob nag gab-i kag wala nakapauli ang duha, nagreport ang amay sa Police Station 7 kag nagpanawagan sa mga radio stations lakip na sa Bombo Radyo Bacolod.
Gilayon nga nag-post sa ila Facebook page ang Station 7 tuhoy sa report kag gin-alerto ang tanan nga police stations sa ciudad tubtob natukiban nga may nobyo ang yaya nga taga-Miagao kag nagatrabaho sa Manila gani mangin ang Bredco Port ang gin-alerto man.
Mismo ang commander sang Station 7 nga si Police Major Sherlock Gabana ang nag-padala sang mensahe sa group chat sang iya mga classmates sang una tubtob nahibaluan nga may yara sang taga-Miagao nga kasimaryo gid sang nobyo sang suspetsado.
Kahapon sang aga sang ginpadulungan sang classmate ni Gabana ang balay sang nobyo ni Martir kag didto sila naabtan sang bata tubtob nga ginsugat ini sang patrol sang Miagao Police Station kag nakatabok balik sa Bacolod matapos ginsugat ni Gabana.
Sang gin-usisa si Martir, ginpahayag sini nga ginpakilala sini sa pamilya sang iya nobyo nga ila bata ang iya ginabantayan.
Natukiban man sa Facebook account sini nga naga-post siya sang gin-collage niya nga picture upod sang iya nobyo kag sang iya ginabantayan nga iya gina-claim ila bata.
Kaso nga kidnapping ang pangatubangon ni Martir nga priso karun sa Police Station 7.
Nahibaluan nga kilalahay man lang si Martir kag iya mga amo bangud tupad-balay sila sang una sa Brgy. Mandalagan antes nagsaylo ang mga ini sa Mansilingan.
Isa pa man lang ini ka semana nga nagabantay sa bata.
