Magapatigayon sang 12 oras nga schedules power interruption ang Negros Electric and Power Corporation (NEPC) sa Bacolod-Silay 69kV line.
Sa interview sang Bombo Radyo Bacolod kay Engr. Leomel Tambanillo, assistant Vice President for planning and business operations sang Negros Power, sila ang magapatigayon sang pag-ilis sang mga daan na nga insulators.
Kabahin sa maapektuhan ang Talisay, Lopez kag Panaogao substation.
Apang paathag ni Tambanillo nga makadali lamang ang power interruption sa Talisay substation kag ibalik man gilayon, samtang halin alas-6:00 sang aga tubtob alas-6:00 sang gab-i naman ang power maintenance sa Lopez kag Panaogao substation.
Nagalaom man ini nga mangin maayo ang tiyempo kag matapos sang temprano ang aktibidad antes pa ang alas-6:00 sang gab-i.
Paathag ni Tambanillo nga kabahin sang prayoridad sa 5-year development plan sang Negros Power ang rehabilitation kag modernization sang mga equipments kag linya, kabahin na ang mga insulators sang main line nga ila islan sang polymer-type, nga mas masaligan, mas mabakod kag mas malawig ang kabuhi.
Panawagan sini nga ugyunan ang ila mga programa sa rehabilitasyon bangod ini ang para man sa tanan nga member-consumers sang Negros Power.
