Kinse ka mga balay ang ginlamon sang kalayo kadungan sang sunog nga nagluntad sa Purok Kingfisher A, Barangay 16, Bacolod City pasado alas-2:00 kaina sang kaagahon, samtang nag-agom sang 3rd degree burn ang ila nga purok president kadungan sang sunog.
Sa interview sang Bombo Radyo Bacolod kay Fire Supt. Jenny Mae Masip, Fire Marshal sang Bacolod City Fire Station, 10 ka mga balay ang totally damaged kag 5 ang partially damaged, apang ang record ang nakabase lamang sa structure nga nasunog kag wala pa ma account ang kadamuon sang apektado nga pamilya kag indibidwal.
Suno diri, ang bulan sang Hulyo ang nagtakop sa sunog sa Barangay 2 samtang ang Agosto ang gin-umpisahan naman sang sunog sa Barangay 16.
Paathag ni Masip nga fire prone area ang parehas nga lugar, gani pag-abot nila alas-2:44 kaina sang kaagahon gilayon nila nga ginpasaka sa 3rd alarm ang sunog bangod madamo sang pamalay sa lugar kag kalabanan ang human sa light materials.
Suno diri, nabatian sang bombero nga may nagapangayo sang tabang ang purok president, kag mapalaron naman nga ini ang narescue.
Nasunog si Alejandro Tiad bangud ginpahayag nga nagbalik sa nagakasunog nga balay agud salbarun ang iya mga kabataan.
Nahimo sini nga mapagwa ang mga bata, apang siya ang natrap kag nag-angkon sang paso sa upper body kalakip na sa mga butkon.
Ini ang gindala man gilayon sa Riverside Medical Center agud mahatagan sang nagakaigo nga pagbulong.
Ang mga apektado ang temporaryo naman nga ginhamtang sa Education and Training Center School (ETCS) extension.
Sa interview sang Bombo Radyo Bacolod kay Punong Barangay Jason Ligaya, ginpasalamatan gid sini ang ETCS extension nga nagcater sa mga evacuees apisar nga may-ara sang klase.
Apang ang mga ini ang isaylo man sa evacuation site sang Barangay, apang sa karun ini ang ginaplastar pa.
Suno kay Ligaya, ini ang ikatatlo na nga beses nga nasunogan ang area.
Nagapanawagan man ini sang bulig gikan kay Bacolod City Mayor Alfredo ‘Albee’ Benitez.
Pahayag sang Punong Barangay nga ang ginakabalaka sang mga biktima ang ila mga uniform nga nagkalasunog kasubong man kun paano liwat nga makatukod sang balay.
