Makabig nga isa ka pinasahi nga mass wedding ang ginhiwat kahapon sa lobby sang Bacolod Government Center.
Nahibaluan nga 220 tanan ka mga pares nagikan sa ciudad sang Bacolod ang libre nga nagpakasal.
Gintambungan ini sang mga city officials kun sa diin si Mayor Evelio “Bing” Leonardia ang nag-officiate sang kasal kag si Philippine Statistics Authority Negros Occidental head Luis Gonzales ang nangin dinapit nga bisita.
Suno sa alkalde, pinasahi ang mass wedding sa subong nga tuig.
Suno diri, ginhungod gid nga 220 ka mga pares lamang ang kaslon bangud sa petsa nga Pebrero 2, 2020 ukon 02-20-2020 nga kaisa lang matabo.
Dugang pa ni Leonardia nga first time man natabo sa mga mass weddings kun sa diin nagagamit sang face mask ang mga ginakasal.
Suno sa iya, makabig man ini nga MassKara festival kun sa diin pamoso ang ciudad.
Nahibaluan nga ang mga face masks ang libre nga ginpanghatag sang City Health Office bilang kabahin sang precautionary measures nga ginpatigayon batok sa coronavirus disease 2019 (COVID-19).
Samtang, sa mensahe nga ginhatag ni Gonzales nga nangin dinapit nga bisita sa Kasalan ng Bayan, ginpahayag sini nga ang bulan sang Pebrero ang ginakabig man bilang civil registration month gani halos kada local govertnment units ang nagapatigayon sang mass wedding ukon free registration.
Ginkilala naman nga oldest couple sanday Jennifer, 62-anyos kag Rolly Dela Cruz, 60-anyos nga naga-upod na sa sulod sang 38 ka tuig.
