BACOLOD CITY-Patay ang tatlo ka mga gina-alegar miembro sang New People’s Army (NPA) sa tunga sang engkwentro nila sang militar sa banwa sang Calatrava.
Alas-5:30 kahapon sang hapon sang nakaengkwentro sang 79th Infantry Batallion (IB) Philippine Army ang kapin sa 12 ka NPA members sa Sitio Banwa Minatay, Brgy. Marcelo, Calatrava.
Sa interview kay Brigadier General Benedict Arevalo, commander sang 303rd Infantry Brigade (IB), ginkumpirmar sini nga tatlo ka rebelde nga grupo ang napatay sa engkwentro santo sa numero sang lawas nga narekober sang militar samtang isa naman ang napilasan sa tropa sang gobyerno apang indi naman malala.
Naglawig sang 30 minutos ang bayluhanay sang luthang antes nagpalagyo ang rebelde nga grupo.
Duha ka high powered firearms ang narekober sa crime scene nga ginalakipan sang isa ka M16 kag isa man ka AK47.
Samtang, ginpakamaayo ni Arevalo nga indi na pag-imando ang evacuation sang mga residente sa lugar bangud indi sini luyag nga magselebrar sila sang Semana Santa sa evacuation center.
Suno sa army commander, indi naman kinahanglan ang evacuation bangud nagpalagyo na ang rebelde nga grupo kag gin upod man nila ang mga barangay officials sa clearing operations.
