Tatlo ka mga suldado ang patay kag apat ang pilason kasunod sang engkwentro batok sa New People’s Army sa Brgy, Carabalan, Himamaylan City, Negros Occidental, kahapon sang aga.
Sa interview sang Bombo Radyo kay 303rd Infantry Brigade commander Col. Inocencio Pasaporte, nagapatigayon sang security patrol ang mga miyembro sang 94th Infantry Battalion para sa tagtaganay sang cash grant sa idalom sang Social Amelioration Program (SAP) sang DSWD.
Suno kay Pasaporte, nakabaton sang report ang militar nga may presensya sang armado nga grupo sa lugar nga nagapang-extort sang kwarta kag nagapangayo sang bugas gani nagpatigayon sang community security patrol.
Malapit na lang kuntani malab-ot sang mga suldado ang mga rebelde sang may naglupok nga improvised explosive device (IED) kag ginhabuyan sila sang hand grenade
Nagbayluhanay pa sang lupok sa sulod sang 30 minutos nga nagresulta sa kamatayon nanday Corporal Joel Nobleza ng Barangay Jagnaya, Jamindan, Capiz.
Si Nobelza ang napatay samtang ginabulong sa ospital.
Magluwas sa iya, patay man si 2nd Lt. Ralph Amante Abibico kag Private First Class Carl Venice Bustamante.
Ang pilason nga mga suldado nga miyembro sang 94th IB ang gindala sang military choppers sa ciudad sang Bacolod.// Sa karun, padayon man ang hot pursuit sang katapo sang 94IB sa mga terrorista nga NPA.
Samtang nagapati man si Pasaporte nga apisar ginpahayag sang terroristang New People’s Army (NPA) nga indi nila miyembro ang isa ka NPA nga nagsungka sang Abril 16, nakalab-ot sa mga ini ang impormasyon nga nahibaluan na kun sa diin sila nga bahin sang Central Negros nagakuta gani posible nga naghalalin ang mga ini kag wala sila nagapaabot nga may yara sang nagapatrolya nga katapo sang 94th IB sa lugar.
