Tatlo ka mga scammer dakop sa joint entrapment operation sang Bacolod City Police Office (BCPO) kag City Investigation and Detection Management Unit (CIDMU) sa Manville Subdivision, Brgy Tangub, ciudad sang Bacolod, kahapon sang hapon.
Ang mga suspetsado ang ginkilala nga sanday Arnold Reyes, 64 anyos, kasado, wala sang trabaho, kag residente sang Sampaloc, Manila; Nelson Elera, 20 anyos, single, wala sang trabaho kag residente sang Talisay, Cebu City kag amay sini nga si Alan Elera, 63 anyos, kasado, nagatrabaho bilang drayber kag residente sang Himamaylan, Negros Occidental.
Sa interview sang Bombo Radyo Bacolod kay Police Lieutenant Colonel Joery Puerto, Chief sang Bacolod City Investigation and Detection Management Unit, modus operande na sang grupo ang pagbaligya sang Artificial Inseminition ukon ang bulong para magbusong ang baka nga nagabalor sang P22,000 apang ang unod sini amo ang ordinary lamang nga juice.
Nagalab-ot naman tubtob sa P3.3 million ang balor sang kada package nga ila mabaligya.
Dugang pa ni Puerto madugay na nga gina-imbestigahan ang grupo kag madugay na ini nila nga modus halin pa sang tuig 2022.
Sa pag-imbestiga sang CIDMU nga parihos sang modus kag sang nawong sang mga suspetsado sang mga nakaligad nga tuig kag amo na nga nagpatigayon sang entrapment operation kung sa diin naaresto ang tatlo ka suspetsado, samtang padayon pa nga ginapangita ang apat nila ka upod.
Nahibaluan naman nga ang mga suspetsado ang indi residente sang ciudad kag ang ila modus ang ila ginahimo sa bisan diin man nga bahin sang pungsod.
