Arestado ang isa ka lalaki matapos makuhaan sang masobra P400,000 nga balor sang suspected shabu sa drug buybust operation nga ginpatigayon sa Purok Villa, Barangay Tangub, Bacolod City alas-7:44 kagab-i.
Ang suspect ang ginkilala nga si Alinel Bedua alyas Toto, 34 anyos, single, wala sang trabaho kag residente sang Purok Paghidaet, Brgy Tangub, Bacolod City, ginakonsiderar nga High Value Individual.
Sa operasyon sang City Drug Enforcement Unit sang Bacolod City Police Office, narecover ang lima ka sachet kag isa ka nakabugkos nga plastic bag sang suspected shabu kalakip ang buybust item.
Ang suspected shabu ang ginabanta nagabug-at sang 60 gramos kag may standard drug price nga P408,000.
Si Bedua ang mangatubang sang kaso sa paglapas sa Republic Act 9165 ukon Comprehensive Dangerous Drugs Act of 2002.
