INDONESIA – 34 ka mga tawo ang patay kasunod sang magnitude 6.2 nga linog nga nagtay-og sa Sulawesi, Indonesia kaina sang aga.
Ginatos naman ang pilason kadungan sang panic nga ginbatyag sang mga residente.
Suno kay Ali Rahman, pinuno sang local disaster mitigation agency, 26 ka mga tawo ang patay sa Mamuju City kag mahimo nga magadamo pa.
Suno kay Rahman, madamo sang mga napatay ang nalubong sa mga debris.
Ginpahayag naman sang national disaster agency nga walo ka mga tawo ang patay sa nabagatnan sang Mamuju sa West Sulawesi province gani nagdangat sa 34 ang numero sang patay.
Ang epicenter sang linog ang nahamtang 6 kilometros sa northeast sang Majene City kag may kadalumon nga 10 kilometros.
Linibo ka mga residente ang nag-evacuate sa hilway nga lugar samtang 60 ka mga balay ang nagkalaguba.
Tuman kabaskog ang pagtay-og sang duta apang wala sang tsunami warning.
Madamo nga mga building ang malala nga nahalitan kalakip ang duha ka hotel, governor’s office kag mall.
Indi naman malabayan ang isa ka dalan pasulod sa Mamuju matapos maguba ang taytay.
Nagtapan naman ang isa ka ospital sa Mamuju matapos magcollapse.
Suno kay Arianto nga nagikan sa rescue agency, may mga pasyente kag empleyado sang ospital nga natrap sa mga debris kag ginatinguhaan nila nga malab-ot ang mga ini.
