Liwat nga sulod sa presohan ang 50 anyos nga lalaki matapos sini sudlon ang balay sang iya anay nobya kag ginkuha ang paborito sini nga manok sa Washington, USA.
Sa video sang Kitsap County Sheriff’s Office, nagpadulong ang kapulisan sa kakahuyan kag nakit-an ang lalaki nga hugot nga nagakapyot sa gin-abduct sini nga manok.
Nagresponde ang mga pulis sa isa ka tawag angot sa insidente sang abduction.
Emosyonal ang lalaki sang naabtan sang otoridad kag nag-ayo nga indi pagsakiton ang gina-uyatan sini.
Ginpalapitan sang pulis ang lalaki kag ginpasurrender para masalbar ang gintaban sini nga manok nga si Polly.
Sang ulihi, nag-upod ang suspek sa pulis samtang uyat-uyat man sini ang manok.
Kaangay pa nga ginasturya sang lalaki ang manok antes ini ginsakay sa sulod sang police mobile.
Suno pa sa otoridad, duha ka oras antes ang insidente, amo lang sang nakagwa ini sa presohan.
Ini kasunod sa pagsulod sini sa balay sang iya anay nobya kag nagasinggitan nga nakuha sini si Polly antes ini naglakat.
May yara sang court protection order batok sa lalaki tuga sang indi maayo nga relasyon nila sang iya ex-girlfriend.
Liwat nga magapangatubang ang suspek sang 10 ka tuig nga pagkapreso kag multa nga masobra sa P1.1 milyon para sa kaso nga residential burglary.
Dugang ini sa isa ka tuig nga pagkapreso kag multa nga P280,000 para sa pagbayolar sang court order.
Samtang, safe naman nga naibalik ang manok nga si Polly.
