Nagapanawagan ang isa ka 58-anyos nga amay sa kun sin-o man ang makakita sang iya wallet nga ginsnatch samtang nagasakay ini sa jeep kahapon nga isurrender sa estasyon sang Bombo Radyo ukon Police Station 1.
Nagahilibion nga nagdangop sa estasyon sang Bombo Radyo kahapon si Gary Tayon, anay Overseas Filipino Worker (OFW) kag residente sang banwa sang Hinobaan, upod ang utod sini nga si Mary Tabon, bangud ginsnatch ang iya itom nga wallet nga may unod nga P7000, SSS ID, PhilHealth ID, PWD ID kag duha ka ATM cards.
Suno kay Tayon, sa mga ATM cards ginapadala ang kwarta nga iya ginapa-dialysis bangud may yara ini sang chronic kidney disease.
Suno sa iya, nagikan ini sa ospital kag nagpadulong sa downtown bangud may yara kuntani ini sang baklon.
Samtang nagasakay sa jeep, suno sa iya, ginpatung-an ini sang duha ka lalaki apang bangud bag-o lang ini nakatapos pa-dialysis kag nagapangluya pa ang kalawasan, wala man sini napyaran nga ginakuot na gale ang iya nga bag.
Pagpanaog sini sa downtown, wala na ang iya nga kahita gani wala na ini nakabakal sang bulong.
Nagahingyo si Tayon sa kun sin-o man ang makakita sang iya nga wallet nga maskin wala na sang unod nga kwarta, kuntani iuli lang ini gihapon bangud nagaunod ini sang mga importante nga IDs kag ATM Card.
Si Tatay Gary ang may yara sang pito ka mga kabataan kun sa diin apat pa ang naga-eskwela kag apisar nga masobra duha ka dekada ini nga nag-ubra sa Saudi Arabia, wala man nangin mahapos ang kabuhi sini.
Suno sa iya, bangud nagabulig siya sa iya pamilya, wala ini sang may napundar kag ang iya nga benepisyo nga nabaton ang ginagasto man para sa pagpabulong.
Apisar sang kabudlayan, gin-engganyo pa ni Tayon ang mga kaangay niya nga naga-antos nga magpakabakod lang kag magpadayon sa kabuhi.
Nagtulo liwat ang luha sang amay apang bangud naman sa kalipay, sang makabaton ini sang bulig nagikan kay Punong Barangay Ricky Mijares Sr. sang Brgy. Banago, Bacolod City.
Matapos mabatian ang istorya ni Tayon, gilayon nga nagpadala sang P1000 si Mijares sa estasyon sang Bombo Radyo.
Tuman ang pagpasalamat ni Tatay Gary kay Mijares gani wala sini mapunggan nga maghibi.
Suno sa iya, dako na ini nga bulig kag nagalaom ini nga bugayan pa gid sang Ginoo ang punong barangay.
