May pila sa atun ilabi nga tuman ang fandom sa isa ka celebrity, apang paano ayhan kun ang imo gina-idolo ang magchat kuno sa imo?
Kaangay lamang sang isa ka 63 anyos nga tigulang nga ginkilala kay Guadalupe Cepeda residente sang Los Angeles, USA.
Idol sini sa sulod na sang 20 ka tuig ang Spanish musician nga si Enrique Iglesias nga isa sa best-selling Latin music artists.
Bangud nga avid fan sang nasambit nga artist ang tigulang, nagpamiyembro pa ini sa fan page ni Enrique.
Paano siya naintuan? Isa ka adlaw, may nagpadala sa iya sang mensahe nga nagpakilala nga si Enrique, kag bangud miyembro siya gani sang fans sang singer, wala na siya nakibot kun ngaa siya ang ginpili nga istoryahon apisar sang tuman kadamo nga kaangay sini nga fans.
Apisar nga kasado kag buhi pa ang bana, nakabatyag ini sang tuman nga kalipay tubtob nga nahulog na ang buot sini sa nagapakilala nga si Enrique.
Kadungan sang paglawig sang pag-istoryahanay, nagplano na si Lola Guadalupe nga bulagan sini ang iya bana, kag mag-upod sa Spanish superstar.
Nagapinsar kag naplanuhan na niya ini apang antes pa man sini mabulagan ang iya bana, nanotisyaran sini nga ginapangayuan na siya sang kwarta.
Bangud nagapati siya nga ang nagamensahe sa iya ang Spanish singer, nagpadala man ini kag humalin sadto masami na ini nagapangayo kag narealisar sang tigulang nga dako na nga kantidad ang nadula sa iya gani ginprangka na sini nga wala na siya sang kwarta.
Natukiban naman sang iya bana ang iya nga online cheating sang ginbuksan ang cellphone sini.
Apisar sang pagpaathag sang bana nga scammer ang nagamensahe sa iya wala gid magpati ang 63 anyos bangud palangga niya ini.
Gintelevise man ang estorya ni Guadalupe agud nga mangin aware ang tanan sang nagapakuno-kuno nga si Enrique agud makapangayo sang kwarta.
Nagpanawagan man ang bana ni Guadalupe sa Spanish Singer nga kun makita sini ang estorya siya na mismo ang makumbinsi sa asawa sini nga indi matuod nga siya ang nagamensahe diri.
