67 anyos nga lalaki, patay matapos mahulog sa pil-as kag malumos sa suba sa banwa sang Isabela

Nasapwan nga naga-utaw utaw sa suba kag wala na sang kabuhi ang 67 anyos nga lalaki sa Sitio Marikudo, Barangay Camangcamang, Isabela, Negros Occidental, kahapon sang kaagahon.

Ang biktima ang ginkilala nga si Romullo Del Carmen nga residente sang nasambit nga lugar.

Sa interview sang Bombo Radyo Bacolod Police Major Joseph Partidas, hepe sang Isabela Municipal Police Station, masami nga nagalagaw si Del Carmen sa suba nga may mataas nga pil-as.

Suno diri, nahulog sa pil-as ang biktima kag nakit-an nga may inagyan nga nagtinguha pa ini nga magkabit.

Wala naman sang foul play nga nakit-an kag wala na sang plano ang pamilya nga ipaidalum pa sa autopsy examination ang bangkay.