Nagapangatubang na sang kaso nga murder ang suspek nga naglabo patay sa senior citizen sa Barangay San Rafael, Hinoba-an, Negros Occidental sang Disyembre 4, 2025.
Ginkilala ang biktima nga si Jesus Flores, 67 anyos, kasado, mangunguma samtang ang suspek amo si Rey Duran, legal ang edad, lunsay mga residente sang Barangay San Rafael, Hinoba-an.
Sa interview sang Bombo Radyo Bacolod kay Police Major Jaynick Bermudez, hepe sang Hinoba-an Municipal Police Station, suno sa pamilya sang suspek ini ang depressed bangud bag-o lamang nalubong ang iya amay.
Sumugod sadto masami ini nga naga-inum sang makahulubog nga ilimnon.
Sang Disyembre 4 sang makalabay ang suspect sa balay sang biktima nga nagapungko, ginsulod niya ang balay kag wala sang madamo nga rason nga ginlabo sini si Flores sa natuo nga dugha kag duha ka butkon.
Ang mga kasilingan sang biktima ang nagtawag sa Hinoba-an Municipal Police Station nga gilayon man nagresponder.
Suno kay Bermudez, bag-o lamang nalabo sang suspek ang senior citizen sang mag-abot ang responding team, kag ini ang nagbato pa sa kapulisan.
Nagpangayo pa ang mga kapulisan sang pahanugot sa hepe kun mahimo gamiton sang mga ini ang ila nga service firearms bangud nagabato ang suspek apang ginpaatras niya ang personnel kag nag-instruct nga panilagan anay ang suspect.
Nakakuha sang kahigayunan ang mga pulis kag natigayon nga maaresto ang suspetsado.
Bisan yara na sa jail facility sang Hinoba-an Municipal Police Station nagapadayon ang pagwaras ni Duran.
Gintawgan sang hpe ang utod sang suspek nga nag-estorya iya agud nga magkalma ini.
Ang ginalantaw nga motibo sa pagpanglabo ang bangod lamang sa kahulugbon.
Napasaka na ang kaso kahapon nga murder batok sa suspek paagi sa inquest proceedings.
