Pito ka mga suldado ang pilason samtang duha naman ka miyemrbo sang New People’s Army ang gina-alegar nga patay kasunod sa natabo nga engkwentro sa tunga sang 62nd IB kag makawala nga grupo.
Nag-dangat sa isa ka oras ang engkwentrohanay sa syudad sang Himamaylan kahapon sang aga.
Sa interview sang Bombo Radyo Bacolod sa commander sang 303rd Infantry Brigade nga si Brigadier General Benedict Arevalo, las-10:30 kahapon sang aga sang natabo ang pagbakbakanay sa duha ka grupo.
Suno kay Arevalo, nakabaton sila sang impormasyon nga may yara sang temporaryo nga kampo ang NPA sa Sitio Asaran, Barangay Buenavista, Himamaylan City, Negros Occidental.
Sang ila gin-kadtoan ang lugar, nag-positibo nga may yara sang gamay nga kuta ang mga ini kag didto nag-engkwentrohanay ang duha ka grupo.
Samtang ginalusong sang mga militar ang kampo sang NPA, hinali na lang sila gin-palukpan sang Improvised anti-personnel landmine (IED) nga gintunaan sang superficial wounds sang mga tropa sang gobyerno.
Apang matapos ang isa ka oras, nag-atras ang mga NPA padulong sa naaminhan-nasidlangan nga bahin sang barangay.
Gilayon naman nga nag-padala sang duha ka mga helicopters ang militar agud mag-patigayon sang hot pursuit operation batuk sa mga armado nga grupo.
Yara naman karun sa hilway nga kahimtangan ang 7 ka mga suldado sa diin sila ang gin-hatagan sang medalya sang commander sang 303rd IB bangud sa adlaw man sang kagitingan.
