Boluntaryo nga nag-sungka sa Isabela Municipal Police Station ang 56 anyos nga lolo matapos ang brutal nga pag-patay sini sa iya nga 8 anyos nga apo sa paka-isa sadtong Dominggo sang gab-i, Mayo 26.
Sa impormasyon nga nakuha sang Bombo Radyo Bacolod, pasado las-6:00 sang gab-i sadtong Dominggo sang natabo ang krimen sa sulod mismo sang balay sang suspetsado nga si Pablo Talanas sa Sitio Aguntilang, Barangay Riverside sa diin nagkadto ang biktima sa iya.
Apang bangud naka-inum ini sang makahulubog nga ilimnon, naling-an siya sa bata nga wala untat ang istorya sa iya.
Bangud sini, gindakop niya ang biktima kag ginlampus ang ulo sa semento sang makapila ka beses samtang ginakuga, kag ginsu-okan man sini sang lipak ang alatrasan sang bata.
Sa interview kay Police Captain Roger Pama, hepe sang Isabela Police Station, gin-ako sang suspetsado ang krimen nga nahimo sini kag dako ang iya pag-hinolsol bangud nag-padala dala siya sa iya emosyon rason nga gilayon siya nga nag-sungka sa mga otoridad.
Sa resulta sang post mortem examination nga ginpatigayon sang medico legal officer sang banwa sang Isabela, napatay ang biktima bangud sa mga patal nga pilas nga naangkon sini.
Kaso naman nga murder ang gin-pasaka sa suspetsado nga yara karun nakahunong sa kustodiya sang Isabela Municipal Police Station.
