BACOLOD CITY — Wala pa nahambalan sang political party nga Love Negros ang ila mangin plano sa 2018 midterm elections.
Ginpahayag ni Negros Occidental Third District Congressman Albee Benitez, nga lider sang amo nga partido, nga wala pa maplastar sang grupo kun sin-o ang magadalagan sa ano nga position.
Apang aminado si Benitez nga tion na agud diskusyunan ang mangin plano sang grupo sa palaabuton nga piniliay ilabi na nga sa Oktubre 2018, maga-file na sang certificate of candidacy ang mga magapadalagan.
Nahibaluan nga si Benitez ang isa sa mga ginatulod nga magpadalagan sa pagka-gobernador apang interesado man sa amo nga posisyon si Vice-Gov. Bong Lacson nga upod sini sa partido.
Angot sini, ginpahayag ni Cong. Benitez nga pananglitan magpadalagan ini sa pagka-gobernador, mangin consensus ukon desisyon ini sang partido.
Samtang, gin-aku man ni Benitez nga nakaistoryahanay sila ni Gov. Alfredo Marañon Jr. angot sa piniliay.
Suno kay Cong. Albee, ginpabutyag sa iya ni Marañon nga mas maayo kun magpadalagan ini sa mas mataas nga posisyon, kaangay sang pagka-senador, bangud mas daku nga bentaha ang madala sini sa bug-os nga Negros Occidental.
Ginpabutyag sang mamalidha nga anuman ang iya mangin desisyon, natuon ini tanan sa kaayuhan sang mga Negrense.
Nahibaluan nga si Gov. Marañon ang lider sang karibal sang Love Negros nga United Negros Alliance (UNA) apang ginpasuni magahugpong ang mga ini kag pagatawgon nga Love UNA (Love you na).
