BACOLOD CITY – Pilason ang tatlo ka miyembro sang Philippine National Police kadungan sang ginpatigayon nga buy-bust operation sa San Carlos City, Negros Occidental kun sa diin masobra P6 milyon suspected shabu ang narekober.
600.8 grams sang ginapatihan iligal nga druga ang nakuha kay Christian Unabia, 29, habal-habal driver kag residente sang Sitio Juan-ong, Barangay Palampas, San Carlos City, pasado alas 11:00 kagab-i.
Magluwas diri, nakuha sang mga pulis kag operatives sang Philippine Drug Enforcement Agency Region 6 ang isa ka small sachet nga buybust item; P30, 000 nga buybust money; P24, 960 nga kita sa pagbaligya sang shabu kag mga drug paraphernalia.
Sa exclusive interview sang Bombo Radyo Bacolod kay Police Superintendent D’Artagnan Katalbas, hepe sang San Carlos City Police Station, nagpalagyo ang subject kag naglumpat sa pil-as sa likod sang ila nga balay rason nga ila ginlagas.
Lipod sa ila ihibalo, may gina-kaingin sa pil-as rason nga napilasan ang mga pulis bangud sa mataliwis nga puno sang ginpang-utod nga mga kahoy.
Napilasan man ang subject sang operasyon.
Nahibaluan nga 10 tubtub 15 kilometros ang kalayuon sang balay ni Unabia sa ciudad kag nabukid na ang ila lugar kag rough road man ang dalan padulong diri.
Sa impormasyon nga natipon sang mga pulis, sa balay nanday Unabia gina-repack ang shabu agud mabaligya sa San Carlos.
Si Unabia ang natalana nga pasakaan sang kaso nga paglapas sa Republic Act 9165 ukon Comprehensive Dangerous Drugs Act.
