Pilason ang isa ka lalaki matapos ginluthang sa Sitio Minoro, Hacienda Isabela, Brgy. Sag-ang, La Castellana.
Ginkilala ang biktima kay Renato Abello, 49 anyos samtang ang suspetsado nga nahibaluan nga hubog ang ginkilala kay Elbert Luzare, residente man sang nasambit nga lugar.
Sa imbestigasyon sang La Castellana Municipal Police Station, nagatindog si Abello sa gwa sang ila nga puluy-an upod ang iya nga asawa sang nag-abot si Luzare sakay sa motorsiklo.
Pagpundo sang suspetsado, ginpamangkot siya sang asawa sang biktima kun ano ang iya nga kinahanglan apang wala ini nagsabat kag hinali lang nga nagkuha sang sulpak kag ginluthang sang makapila ka beses si Abello.
Nag-angkon ini sang tatlo ka pilas sa dughan kag apat sa kamot.
Gilayon naman nga nakapalagyo ang suspetsado.
Sa karun, ginapangita pa si Luzare sang mga kapulisan kag desidido ang pamilya ni Abello nga magpasaka sang kaso nga attempted homicide.
