Ginkumpirmar ni Bacolod City Lone District Congressman Greg Gasataya nga nagapadayon ang konstruksyon sang drainage system sa dalan Araneta.
Sa interview sang Bombo Radyo Bacolod kay Gastaya, ginpahayag sini nga 70 porsyento na nga natapos ang nasambit nga proyekto nga nagabalor sang P9.6 million.
Target nga matapos ang drainage system nga may kalaba-on nga 510 meters sa Disyembre 24 sini nga tuig.
Una diri, nag-request si Gasataya sa Department of Public Works and Highways (DPWH) nga magpatigayon sang pagtuon agud masolusyunan ang problema sa baha sa ciudad.
Naguwa sa resulta nga kinahanglan magdugang sang drainage.
Suno kay Gasataya, dako gid ang pagpasalamat niya sa DPWH bangud masolbar na ang problema sa baha sa nasambit nga lugar.
Paathag sini, indi na makasarang sa volume sang tubig tagsa mag-ulan ang mga existing drainage nga nahamtang sa area.
Nagapangabay naman ang kongresista sa publiko nga indi maghaboy sang basura sa bisan diin lang agud indi magsupon ang mga drainage system nga nagatuga sang pagbaha.
