Masobra P300,000 nga balor sang illegal nga droga ang kabug-usan nga nakompiskar sa buybust operation nga ginpatigayon sang Bacolod City Police Station 2 kag Police Station 7, Lunes nga adlaw.
Sa operasyon nga ginpatigayon sang Bacolod City Police Station 2 sa Purok Sereza South, Brgy. 3, Bacolod City, nadakpan sanday Daryl Hacosalim, 38 anyos; Herold Plamares, 22 anyos; kag Mark Fiel, 42 anyos.
Nakuha sa ila paghinakop ang anom ka sachet sang suspected shabu, P200 nga mark money kag P120,000 nga balor sang illegal nga droga.
Samtang, P220,000 naman nga balor sang illegal nga droga ang nakompiskar sa operasyon nga ginpatigayon san Bacolod City Police Station 7 sa Block 13, Lot 30, Purok Kabugwason, Brgy. Vista Alegre.
Ginkilala ang mga suspetsado kanday Mark Justin Espino, 23 anyos kag Jim Morison, 27 anyos.
Nakuha sa ila paghinakop ang walo ka sachet sang suspected shabu, P500 mark money kag iban pa nga mag drug paraphernalia.
Sa karun, nakahunong ang mga suspetsado sa Bacolod City Police Station 2 kag Bacolod City Police Station 7 kag natalana nga pasakaan sang kaso nga paglapas sa Republic Act 9165 ukon Comprehensive Dangerous Drugs Act of 2002.
