Ginpaathag sang chairman sang committee on human rights sa Sangguniang Panlungsod sang Bacolod nga nakadepende sa presidente kun sin-o ang priso nga hatagan niya sang pardon ukon pagpatawad sa krimen nga iya nahimo.
Suno kay Bacolod City Councilor Renecito Novero, pagusto ang presidente kun sin-o ang hatagan sang pardon, may kwalipikasyon man ukon wala, bangud nakabutang ini sa gahum sang chief executive sa idalom sang Konstitusyon.
Suno kay Novero, mercy ukon kaluoy ini sang presidente agud nga indi masilutan ang natungdan.
Kun parole ang iga-avail suno kay Novero, kinahanglan nga mag-apply ang priso sa idalom sang Parole and Probation.
Kun luyag naman sini nga mag-avail sang pardon, sarang man nga mag-apply ang priso agud nga matalupangdan sang presidente.
Ang parole, commutation of service, reprieve kag pardon ang ginahatag sa convicted na gid nga priso samtang ang amnesty naman ang ginahatag sang presidente sa tawo nga akusado apang wala pa nasentensyahan ukon wala pa naakusaran apang sila ang miyembro sang rebelde nga grupo.
Diri man maga-apply ang good conduct time allowance sang priso kun sa diin nagakabuhinan ang inadlaw sang ila nga pagserbe sang sentensya kun mabuot ini sa sulod sang prisuhan.
Ang executive clemency ang masami nga ginahatag sang presidente sa tion sang Paskwa ukon kadungan sang iya kaadlawan.
Isa man sa mga factors diri ang edad sang priso kag ang kabug-aton sang krimen nga ila nakomiter apang indi mapunggan ang presidente kun nagdesisyon ini nga maghatag ang clemency sa isa ka bilanggo.
