Ginpaathag ni Bacolod City Councilor Atty. Renecito Novero nga may derecho ang isa ka pasahero nga magsakay sa isa ka salakyan ukon indi kag may yara man sang derecho kun ano nga sahi nga salakyan ang sakyan.
Sang tinalikdan nga adlaw, isa ka driver sang Alijis Central Market nga jeep ang navideohan nga nagpangakig sa driver sang modernized jeepney bangud diri nagsakay ang pasahero nga suno sa iya, iya na kuntani nga pasahero.
Ginpapili naman ang mga pasahero kun sa diin sila masakay kag ila ginpili nga magsakay sa modernized jeepney.
Sa interview sang Bombo Radyo kay Novero, wala sang may makapilit sa pasahero kun sa diin ini masakay.
Ang driver naman ang may obligasyon nga ginatawag nga extraordinary diligence kun sa diin indi mapagiho ang salakyan samtang nagasakay ukon nagapanaog ang pasahero agud malikawan ang aksidente.
Sa tion nga mahulog ang pasahero bangud naggiho ang salakyan samtang wala pa nakaplastar, liability ini sang driver bangud sa kakulang sang diligence.
Kun nagpundo ang driver bangud may pasahero, imbitasyon lang ini sang driver kag indi maobligar ang pasahero nga magsakay.
Aminado si Novero nga kabuhi na sang mga driver ang paghulat sa mga pasahero kaangay kun sila ang nagatabok sa dalan agud engganyuhon ang mga ini nga magsakay apang indi mapilit ang commuter nga magsakay bangud naghulat na ang jeep.
