May pila ka mga nagpadulong sa MassKara Hall sang Bacolod City Government Center subong nga adlaw agud nga magkuha kuntani sang educational assistance nagikan sa Department of Social Welfare and Development nga wala nahatagan bangud indi para sa ila ang mensahe nga ila ginpakita sa staff sang DSWD.
Sa interview sang Bombo Radyo kay Belen Gebusion, provincial monitor sang DSWD Region 6 para sa Negros Occidental, may iban nga nagpadulong sa venue ang may yara sang screenshot sang mensahe nga nagikan sa DSWD apang wala ang ila ngalan sa computer sang DSWD staff.
362 ang ginalauman nga mahatagan sa ciudad sang Bacolod subong nga adlaw kun sa diin target nga maakomodar ang mga natalana kuntani nga magbaton sang August 27, September 3 kag September 10.
Ginalantaw ang notification nga ginapakita sang probable recipient kag kun indi makita ang ila ngalan sa listahan sang magabaton subong nga adlaw, ginarefer ini sa Information and Communication Technology Management Section nga nagavalidate.
May kaso naman nga nakigamit sang email ukon contact number sang iban ang applicant bangud wala ini sang cellphone kag sang nagpadala sang mensahe ang DSWD, ginpinsar sang tag-iya sang cellphone nga para sa iya ang mensahe gani nagkadto ini sa venue.
Suno kay Gebusion, indi gid mahatagan sang ayuda ang tawo nga nagkadto kun indi para sa iya ang mensahe bisan iya pa nga email address ukon contact number ang gingamit.
Wala naman gina-entertenar nga walk-in bangud ginavalidate na ang ginapakita nga pamatuod sang notification nagikan sa DSWD.// 2,231 naman potential applicants ang target sa 31 ka LGUs sa Negros Occidental.
Ginasipot naman ang mga naakomodar apang napadal-an sang notification sa nakaligad nga tatlo ka semana.
Magahimo naman sila sang bag-o nga listahan nagikan sa bag-o nga applications kag sa mga nagdrop sang application sa drop box nga ginbutang sang DSWD.
