Plantsado na ang traffic enforcers sang Bacolod Traffic Authority Office nga igadeploy sa Panaad Park and Stadium subong nga adlaw kadungan sang opening salvo sang MassKara sa Panaad nga magadugay tubtub Oktubre 16.
Sa interview sang Bombo Radyo Bacolod kay Police Major Junji Liba, pinuno sang BTAO, may yara sang 25 ka mga traffic enforcers nga igadeploy sa Panaad Park and Stadium kalakip na ang ginbutang sa entrance kag sa sulod sang stadium.
Samtang pulo naman ka trafffic enforcers ang igadugang sa Upper East bangud kinahanglan sang diutay nga deployment.
Sa kabug-usan, 35 ka mga traffic enforcers ang igadeploy para sa pagdirect sang trapiko sa MassKara sa Panaad.
Aminado man si Liba nga may yara sang kinahanglan nga fill-inan nga pwesto bangud may yara sang kulang sa deployment gani temporaryo naman nga kuhaon ang pila ka mga nakapwesto na nga traffic enforcers agud nga mapun-an ang kulang nga deployment.
Nagpanawagan man ini sa publiko nga sundon ang mga pagsulundan sa trapiko ilabi na sa ginapatuman sa tion sang Masskara Festival subong nga tuig agud nga mangin matalunsay ang dalagan sang trapiko sa syudad sang Bacolod.
