Arestado ang isa ka Indian national kag ang kaupod sini nga isa ka Pilipino matapos nga manghold-up sa isa ka gasoline station sa Brgy 1, ciudad sang San Carlos, Negros Occidental, ala-1:45 kahapon sang kaagahon.
Ang mga suspetsado amo ang Indian national nga si alyas Singh, 35 anyos, kasado, kag ang kaupod sini amo si alyas Aldrin, 26 anyos, single, lunsay mga residente sang ciudad sang Sagay.
Sa interview sang Bombo Radyo Bacolod kay Police Capt. Honey Labaro, deputy chief of police sang San Carlos City Police Station, nagpadulong sa gas station ang duha para magpagasolina apang sila ang nagdeklarar sang hold-up.
Gindala ni Aldrin ang cashier kun diin nakabutang ang kwarta kag ginkuha ang P16,685.
Apang, wala nakita sang duha nga may security guard nga nagabantay sa madulom nga area kag sang ini ang nakita ni Aldrin nagpanic ini kag gintiro ang gwardya.
Wala naigo ang gwardya nga nagbalos man sang tiro kag naigo ang kilid nga bahin sang ulo ni Aldrin apang ini ang nadaplisan lamang.
Gilayon naman nga nalagyo ang duha sa nagkalain-lain nga dereksyon.
Naabtan sang mga kapulisan si Aldrin nga nagahapa sa kahilamonan samtang si Singh naman ang nadakpan sa Endrina Street, Brgy 4, ciudad sang San Carlos paagi sa hot pursuit operation.
Suno kay Labaro, gina-verify pa kun si Singh amo man nga suspect sa kaso nga frustrated murder sa ciuad.
Sa karun, ginabulong pa sa ospital si Aldrin samtang si Singh naman ang yara sa kustodiya sang kapulisan.
