Walo ka mga balay ang nahalitan kadungan sang sunog nga nagluntad sa Zone 2, Barangay Mambulac, Silay City, Negros Occidental.
Sa interview sang Bombo Radyo Bacolod kay Silay City Fire Marshal Fire Superintendent Rodel Legaspi, walo ka balay ang nahalitan sang sunog kun sa diin apat ang totally damaged kag apat man ang partially damaged.
Ang mga totally damaged nga balay ang ginapanag-iyahan nanday Rolando Barba, Marife Gabriel, Richard Gabriel kag Mary Jane Salazar.
Suno kay Legaspi, nagdangat sa P96,450 ang ginbilin nga kahalitan sang sunog.
Suno pa diri, madasig ang paglapta sang kalayo bangud mamadlos ang hangin kag may kabudlayan man bangud nagalain-lain ang direksyon sang huyop sang hangin kun sa diin ang aso ang nahaklo sang mga bumbero.
Nagapasalamat man ini may na-train nga mga force multipliers nga nagbulig sa pagpalong sang kalayo kag nagbulig man ang Talisay City Disaster Risk Reduction Management Office.
Ginpahayag ni Legaspi nga natumod nila nga sa balay ni Marife Gabriel naghalin ang kalayo apang suno sa mga witness, wala na ini ginaestaran bangud may bag-o na ini nga balay.
Dugang pa sang mga witness nga nagahampang ang mga bata sa daan nga balay ni Marife nga ginhalinan sang kalayo nga nagtuga sang sunog.
Sa karun padayon ang ila nga imbestigasyon kag pagpakig-angot sa mga witness agud matumod gid kun paano nag-umpisa ang kalayo.
