Ginpasalig sang public information officer sang Department of Education division of Negros Occidental nga wala pa sang reported nga naka-eksperyensya sang heat-related illnesses sa mga humalampang sa 2025 Western Visayas Regional Athletics Association Meet (WVRAA 2025) sa Antique.
Ini sa pihak sang forecasted maximum heat index nga 40 degrees Celsius sa Panay.
Sa pihak sang mainit nga temperatura, padayun man nga naga-init ang kompetisyon.
Sa interview sang Bombo Radyo Bacolod kay Ian Arnold Arnaez, nagapadayun ang hampang sa WVRAA 2025 kag may mga adjustment lamang sa schedule sang mga outdoor games.
Nagapati ini nga ang WVRAA management ang may nakapreparar man nga mga tikang agud maproteksyonan ang mga kabataan sa pihak sang tuman ka init nga tiyempo.
Ang hampang ang natalana nga matapos sa Sabado kag sa Domingo, magabyahe naman balik sa Negros Island ang mga atleta.
Suno kay Arnaez, kun may ara sang mga injuries ini ang magagmay lamang kag game-related.
Samtang sa latest nga medal tally ala-1:05 subong nga hapon sa Elementary nagapanguna gihapon ang Negros Occidental nga may 52 gold, 30 silver kag 38 bronze samtang ang Iloilo nga may 42 gold, 45 silver kag 24 bronze; Antique nga may 8 gold, 3 silver, 9 bronze kag ginasundan na sang Capiz, Guimaras kag Aklan.
Sa Secondary, nagapanguna naman ang Iloilo nga may 76 ka gold; 59 ka silver kag 56 ka bronze; Negros Occidental nga may 69 ka gold; 50 silver kag 43 bronze, Aklan nga may 20 gold, 22 silver kag 36 bronze, nga ginasundan naman sang Capiz, Antique kag Guimaras.
