Ginabawian na sang kabuhi ang anay Punong Barangay sa Bago City nga nacomatose kasunod sa nagluntad nga shooting incident sang Marso 7, sa Bangga Tomaro, Brgy. Sum-ag, Bacolod City.
Madumduman nga naabtan sang Bacolod Police Station 9 ang Nissan Navarra nga may pila ka buslot sang bala samtang yara sa sulod ang duha ka biktima nga sanday Carmelita Davila nga yara sa passenger seat kag ang driver nga si anay Punong Barangay Federico “Bimboy” Gayagas Jr. sang Barangay Bacong, Bago City.
Si Carmelita ang may igo sang bala sa nawala nga kilid nga gintunaan sang iya kamatayon samtang si Bimboy ang may igo naman sa natuo nga agtang nga naglapos sa nawala nga gin-comatose.
Sa trajectory investigation sang Scene of the Crime Operation (SOCO), natumod nga gikan sa sulod sang salakyan ang bala.
Suno kay Police Captain Andy Ofalia, station commander sang Bacolod Police Station 9, Ginalantaw nga may-ara sang pagbaisay sa duha nga nagresulta sa pangpangluthang, bangod sa natipon nga impormasyon ang lupok ang nabatian na samtang nagadalagan pa ang salakyan.
Suno kay Ofalia, mahimo nga una nga naluthangan sang anay Punong Barangay ang live-in partner kag sunod sini nga ginluthang ang kaugalingon.
Ginbawian sang kabuhi si Gayagas kahapon alas- 3:30 sang hapon.
