Ginahulat pa sang Bacolod Police Station 9 ang resulta sang ginconduct nga paraffin test sa mag-live in partner nga napatay sa shooting incident nga nagluntad sang Marso 7, sa Bangga Tomaro, Brgy. Sum-ag, Bacolod City.
Ang duha ka biktima amo sanday Carmelita Davila kag anay Punong Barangay Federico “Bimboy” Gayagas Jr. sang Barangay Bacong, Bago City.
Si Davila ang may igo sang bala sa nawala nga kilid nga gintunaan sang iya kamatayon samtang si Gayagas ang may igo naman sa natuo nga agtang nga naglapos sa nawala nga gin-comatose apang ginbawian man sang kabuhi.
Suno kay Police Captain Andy Ofalia, station commander sang Bacolod Police Station 9, ginahulat na lang ang resulta sang paraffin test kag ballistic test nga makabulig sa pagsolbar sa kaso.
Suno diri, may yara sila sang nakita nga CCTV footage kun sa diin nakita ang salakyan nga ginsakyan sang duha nga nagabyahe kag nag-amat amat nga naghinay kag nagpahigad kag nag-untat apang wala sang may nakita nga aggression ukon pagpang-atake man sa gwa sang salakyan.
Samtang, ginpili na lang sang pamilya sang duha ka biktima nga indi na maghatag sang komento angot sa insidente.
Nahibaluan nga si Gayagas ang may tatlo ka kabataan kag ang anay asawa sini ang nagatrabaho sa Manila.
Sa karun yara pa sa punerarya ang bangkay ni Gayagas samtang ang bangkay naman ni Davila ang ginaproseso naman sang pamilya sini.
