Magapadangat ang Bacolod City Local Government sang bulig sa mga biktima sang hit and run sa Barangay Alangilan, Bacolod City sang Biyernes Santo.
Sa press conference ni Bacolod City Mayor Alfredo “Albee” Benitez, nagpadala na ang ciudad sang Bacolod sang bulig sa tanan nga mga nasamaran kasubong man ang burial assistance sa pamilya sang tatlo nga nagtaliwan bangud sa nagluntad nga hit and run.
Nahibaluan nga ang mga nagtaliwan ang ginlakipan nanday Jonelo Solan, Sr., 66-anyos, kag residente sang Purok 6, Brgy. Alangilan, Bacolod City ang driver sang traysikol nga gin-arado sang salakyan samtang napatay sa ospital sanday Gilven Tabique kag Daynah Plohinog, nga lunsay pasahero sang traysikol.
Subong nga adlaw may yara man sang scheduled psychological first aid nga ifacilitate sang personnel sang Bacolod City Health Office, Department of Social Welfare and Development kag Bacolod City Disaster Risk Reduction Management Office sa Barangay Alangilan.
Ini ang patigayunon bangud madamo ang nakasaksi sa makasilidni nga hitabo nga tubtob sa karun wala pa ang mga ini nakamove-on.
Una naman nga nagpahibalo paagi sa social media ang Our Lady of the Most Holy Rosary Parish & Shrine nga may patigayunon psychological first aid sa parokya.
Ang registration magaumpisa alas 8:00 ang takna sang aga samtang ang nasambit nga aktibidad ang magaumpisa alas 9:00 ang takna sang aga.
