Arestado ang mag-utod matapos makuhaan sang kapin tunga sa milyon nga balor sang suspected shabu sa drug buybust operation nga ginpatigayon sa Purok Lubi, Barangay 3, Bacolod City alas-4:45 kaina sang kaagahon.
Ang mga subject person amo si Jan Rey Malde alyas Gab, 31 anyos, single, wala sang trabaho, samtang naulamid man ang iya manghod bangod sa pagkunsaba nga ginkilala nga si Daisy Mae Malde alyas Roma, 28 anyos, single, lunsay mga residente sa nasambitan nga lugar.
Sa interview sang Bombo Radyo Bacolod kay Police Lt. Richard Legada, assistant chief sang City Drug Enforcement Unit sang Bacolod City Police Office, si Gab ang naaresto na sang 2017 bangod sa illegal nga droga kag nakagwa sang 2022.
Suno diri, sila ang nakabatun sang tip nga masupog ang pagbaligya ni Gab kag dalagko ang balor sang ginapagwa sini nga illegal nga droga.
Gani ini ang ginmonitor sa sulod sang tatlo ka semana tubtob napatigayon ang operasyon.
Suno kay Legada, si Gab amo ang masami nagapanagtag sang illegal nga droga, kag tumalagsahon lamang nga may nagakadto sa ila balay agud magbakal.
Narecover sa paghinakop sini ang lima ka heat-sealed plastic sachet kag isa ka nakabugkos nga plastic sachet sang suspected shabu nga ginabanta nagabug-at sang 65 gramos kag may standard drug price nga P442,000.
May naggwa naman nga impormasyon angot sa source sang illegal nga droga, apang ini ang ginavalidate pa.
