Nagbalik normal na ang sitwasyon sang Rome, Italy pila ka adlaw matapos nga nalubong si Pope Francis.
Sa interview sang Bombo Radyo Bacolod kay Jeff Vinas Lagos, Bombo International News Correspondent direkta sa Vatican, normal na ang sitwasyon sa Vatican samtang nagahulat sang Mayo 7, ang natalana nga adlaw sa pagpili sang madason nga Santo Papa.
Suno kay Lagos apisar nga wala pa sang bag-o nga Santo Papa mahimo na makasulod ang mga tawo sa St Peters Basilica sa Vatican.
Suno pa diri, mahimo naman makabisita ang mga tawo sa lulubngan ni Pope Francis sa Santa Maria Maggiore.
Ginpahayag man sini nga nagadamo ang turista sa Rome, Italy bangud nagabantay ang mga ini kun sin-o pagapilion agud mangin madason nga Santo Papa.
Samtang, gindula naman ang pangalan ni Cardinal Luis Antonio Tagle kag ang duha ka Italian Cardinals sa listahan sang mga posible nga pilian agud mangin madason nga Santo Papa agud nga malikawan ang pagpre-empt bangud ini ang pagapilian pa sang mga Cardinals sa patigayunon nga Conclave sa Mayo 7 sa Sistine Chapel sa Vatican.
Apang para kay Lagos dako ang paglaom sini nga Filipino ang mapilian nga madason nga mangin Santo Papa sang Simbahang Katolika.
Nagpahayag man si Lagos nga personal ini nga magapadulong sa sagwa sang Sistine Chapel sa Vatican sa Mayo 7 agud personal nga mabantayan ang masunod nga pagapilion nga Santo Papa.