Subong nga Huwebes, padayun ang pagmonitor sa Low Pressure Area nga yara sa sulod sang Philippine Area of Responsibility.
Alas-3:00 kaina sang kaagahon, ang LPA ang ulihi nga nasiplatan 80km East Northeast sang Cuyo, Palawan.
Wala naman ginalauman nga mangin Bagyo ang nasambitan nga LPA kag mahimo nga matunaw na sa masunod nga 24 oras.
Ang LPA ang lauman nga makatuga sang maulanon nga panahon partikular na sa Southern Luzon, bilog nga Visayas kag naaminhan nga bahin sang Mindanao.
Aga pa lamang, maeksperyensyahan na ang mga pag-ulan partikular na diri sa atun sa Negros Island Region, Western Visayas kag Palawan dala sang LPA.
May tion naman nga mangin mainit sa Central kag Eastern portion sang Visayas sa adlaw, apang pagdangat sa hapon tubtob sa gab-i lauman man ang mga pag-ulan dala sang Trough ukon ikog sang LPA.
Samtang nagapabilin gihapon ang epekto sang Easterlies ukon mainit nga hangin gikan sa Dagat Pacifico sa nabilin nga bahin sang Luzon kag Mindanao.
Ang Easterlies ang may kaupod nga madamo nga moisture gani mataas ang tyansa sang pag-ulan nga kun kis-a may kaupod nga pagpangilat kag pagpanaguob ukon thunderstorms partikular na sa hapon tubtob sa gab-i.
