Napasakaan na sang kaso ang apat ka suspek lakip na ang tatlo nga wala pa nakilal-an sa pagbuno-patay sa 18 anyos nga lalaki sa Barangay Mandalagan, Bacolod City.
Ang biktima ang ginkilala nga si Hakiru “Yuri” Legaste, 18 anyos, residente sang Barangay Efegenio Lizares, Talisay City, samtang ang nagbuno ang ginkilala naman nga si Adrian Cagayao.
Sa interview sang Bombo Radyo Bacolod kay Police Major Rondyl Tapang, station commander sang Bacolod Police Station 3, nagsungka sa opisina ni Bacolod City Police Office Director Police Col. Joeresty Coronica si Cagayao samtang ang tatlo sini ka upod ang nagapabilin nga wala pa sang identity.
Suno diri, kahapon sang hapon natigayon ang inquest proceedings kag napasakaan sang kaso nga homicide ang mga suspetsado.
Suno pa diri, nalakip ang tatlo ka John Does sa ginpasakaan sang kaso apisar nga si Cagayao lang ang nagbuno, bangod sila nga tatlo ang involved sa gihapon kag nagbulig sa krimen.
Mensahe ni Tapang, ang mga kabataan nagakinahanglan sang guidance halin sa ila ginikanan agud indi mauyang ang maayo nila kuntani nga putoro.
