Kun sa damgo gani kalain na sang imo pamatyag kun napalibutan ka sang man-og kag buwaya apang paano nalang kun matabo ini in reality?
Kaangay lamang sa once in a lifetime and very traumatic unforgettable experience sang lima ka mga tawo sa Bolivia sang nagcrash ang ila ginasakyan nga eroplano sa isa ka suba sa Amazon forest nga napalibutan sang mga buaya kag man-og.
Suno sa mga mga opisyal, na-missing ang gamay nga eroplano sa sulod sang halos duha ka adlaw kag nakita sang mga mangingisda sa Itanomas Rivers.
Sa ginpatigayon nga search and rescue operation, nakita ang mga survivors nga ginalakipan sang tatlo ka mga babayi, isa ka bata kag ang piloto, kag maswerte nga yara sa maayo nga kondisyon.
Ginpahayag sang piloto nga si Pablo Andrés Velarde nga may natabo nga engine failure rason nga napilitan sila nga maghimo sang emergency landing sa suba.
Nagtinir sila sa atop sang naglugdang nga eroplano nga ginapalibutan sang mga buwaya kag man-og nga tuman lang ka lapit sa ila gani indi sila makahulag.
Mahimo nga nagtagas nga gatong nagikan sa eroplano ang naghatag sa ila sang proteksyon kag wala sila ginpalapitan sang mga sapat.
Sa sulod sang 36 ka oras, nagmantinir sila sang harina nga dala sang isa ka pasahero samtang nga ginakagat sila sang mga lamok kag ginalantaw sang mga buwaya kag man-og.
